|
Hvað er einsdæmi? Björn Bjarnason hefur það nánast fyrir reglu að úrskurða það einsdæmi ef menn hafa aðrar skoðanir á öryggis- og varnarmálum en hann. Á heimasíðu sinni 19. desember sl. sagði Björn leitun að "vinstri flokki í allri Evrópu, utan Serbíu, Rússlands og Hvíta-Rússlands, sem hefur það á stefnuskrá sinni að grafa undan NATO," í framhaldi af því að þingmenn VG lögðu til niðurskurð á fjárveitingum til fastanefndar Íslands hjá NATO. Þennan úrskurð sinn ítrekaði Björn svo í Silfri Egils á Skjá 1 í gær. Máli sínu til stuðnings nefndi Björn að þingmaður norskra sósíalista hefði á Norðurlandaráðsþingi undrast afstöðu VG til loftárása NATO á Júgóslavíu sl. vor.Nú var það að vísu svo að Sosialistisk Venstreparti í Noregi var einmitt sá eini af róttæku vinstriflokkunum á Norðurlöndum sem ekki lýsti andstöðu sinni við framferði NATO í Júgóslavíu. Vänsterpartiet í Svíþjóð, Socialistisk Folkeparti í Danmörku og Vänsterförbundet í Finnlandi hafa tekið í sama streng og Vinstrihreyfingin - grænt framboð. Björn myndi gera vel í því að lesa t.d. um afstöðu sænska vinstriflokksins til NATO en kjarnann í henni má finna hér. Fyrir þá sem ekki nenna að smella á tengilinn er lykilsetningin svona: "Vänsterpartiet vill bygga vidare på den svenska traditionen med neutralitet och alliansfrihet. Vi avvisar därmed alla idéer om att knyta Sverige närmare försvarsalliansen NATO." Þannig er nú það. Spyrja má hvort það sé einsdæmi í lýðræðisríki að menntamálaráðherra hafi ekki hugmynd um tilvist stjórnmálaflokka í næstu nágrannaríkjum, jafnvel þó þeir hafi fylgi í kringum tíu prósent og fái þar að auki mun meira í kosningum til Evrópuþingsins.
sh
|
