|
Djarfir Danir 25.8.2005 Á undanförnum árum hafa lög um svokallaðar varnir gegn hryðjuverkum verið hert og víkkuð út í mörgum ríkjum heims, ekki síst þeim sem hafa verið að mestu eða öllu laus við slíka vá um langa hríð og jafnvel öldum saman. Kemur þar gjarnan til blanda af aukinni vænisýki stjórnvalda í garð almennings og von um klapp á kollinn frá vestrænum herveldum. Hlutföllin eru svo auðvitað mismunandi frá einu landi til annars.Ein þeirra hægristjórna sem hvað fastast hefur fylgt Bandaríkjunum í svokölluðu stríði gegn hryðjuverkum er ríkisstjórn Danmerkur og líklega er það aðeins sú breska sem hefur verið Washington hjálplegri við að gera heiminn hættulegri síðastliðin fimm ár. Líkt og í flestum öðrum ríkjum Evrópusambandsins kveða dönsku hryðjuverkalögin á um að óheimilt sé að styðja fjárhagslega fjölmörg samtök og hreyfingar sem eru á lista ESB yfir hryðjuverkasamtök. Dönsku samtökin Oprør, sem stofnuð voru í fyrra og telja um 600 manns, hafa stutt PFLP í Palestínu og FARC í Kólumbíu með talsverðum fjármunum síðastliðna tólf mánuði. Þetta hafa Danirnir gert fyrir opnum tjöldum þrátt fyrir að bæði FARC og PFLP séu á fyrrnefndum lista ESB yfir hryðjuverkasamtök. Markmið Oprør með þessum peningasendingum er ekki síst að vekja athygli á því að nefndur listi ESB styðst ekki við neinar lagalegar skilgreiningar heldur er hann einungis afrakstur af samningaþófi aðildarríkjanna um það hverjir eigi að vera á listanum og hverjir ekki. Engar lýðræðislegar stofnanir fjölluðu um þessi efni og talsmaður Oprør, Patrick Mac Manus, segir í umfjöllun fyrir fréttastofuna ANNCOL að listinn hafi ekkert gildi fyrir dómstólum. Enn er óvíst hvort á slíkt muni reyna. Bæði kólumbíski sendiherrann á Norðurlöndum og varaforseti Kólumbíu hafa þó átt viðræður við utanríkisráðherra og dómsmálaráðherra Danmerkur vegna málsins. Þar að auki hefur dómsmálaráðuneytið í Bogotá sent dönskum lögregluyfirvöldum lista með 30 spurningum sem það vill að lagðar verði fyrir félaga í Oprør ef þeir verði færðir til yfirheyrslu. Talið er að það yrði mikill höfuðverkur fyrir dómstóla að fást við mál af þessu tagi þar eð listi ESB yfir hryðjuverkasamtök hefur enga lagalega undirstöðu. Þar af leiðandi þyrftu dómstólarnir fyrst að kveða upp úr um eðli umræddra hreyfinga og hætta á að réttarhöldin færu í reynd að snúast um orsakir átakanna í Kólumbíu og Palestínu. Fróðlegt væri að fylgjast með framvindu og niðurstöðu slíkra réttarhalda ef til þeirra kæmi.
sh
|
