Uppgjöf Kennarasambandsforystunnar 15.2.2006 Furðulegt samkomulag forystu Kennarasambandsins við menntamálaráðherra þar sem forystan lofaði að láta af andstöðu við styttingu framhaldsskólans og samdi um leið um aðra allsendis óskylda hluti hefur að vonum valdið taugatitringi meðal kennara, enda þessi sátt í engu samræmi við vilja þeirra, eins og hann hefur ítrekað komið fram í könnunum, á fundum og ýmsum ályktunum.Ráðherra hefur að vonum túlkað þetta samkomulag þannig að nú sé sátt komin um það að framhaldsskólinn verði styttur um fjórðung. Því fer þó víðs fjarri. í fyrsta lagi bendir ekkert til þess að forysta sambandsins sé í takt við meirihlutavilja félagsmanna sinna. Í öðru lagi snýst þetta mál alls ekki um kjör kennara heldur um það hvort gengisfella skuli nám til stúdentsprófs. Nú liggja fyrir tillögur ráðherra um nýja námskrá sem taka af öll tvímæli um að draga á úr inntaki stúdentsprófsins. Íslenskumenntun verður almennt lakari, raungreinamenntun verður almennt lakari, tungumálanám verður almennt minna. Samt sem áður ljær ráðherra ekki máls á öðru en að þessi námskrá skuli keyrð í gegn og nú á að kaupa menn til fylgis við hana með því að afnema samræmd próf. Það sætir nokkurri furðu að forysta Kennarasambandsins skuli hafa tekið að sér að standa að þeim gjörningi. En jafn ljóst er að ekkert hefur verið rætt við almenna kennara eða stúdentsefni og síst af öllu við þá sem þessi stefna mun bitna á en það eru stúdentsefni framtíðarinnar. Því miður er ekkert sem bendir til þess að yfirvöld menntamála ætli núna að snúa við blaðinu og þeim mun óskiljanlegra er að forystumenn kennara skuli hafa lagt blessun sína yfir þennan gjörning. Um leið valda fyrstu viðbrögð stjórnarandstöðunnar á þingi vonbrigðum því að margir áttu von á að hún hefði bein í nefinu. Minna kemur á óvart að atvinnuverkalýðsleiðtogar hafi smám saman orðið tannlausir eftir langa vist á skrifstofunni. Hvort ráðherra verður að ósk sinni að knýja gengisfellinguna í gegn er ennþá óljóst. Andstaðan við styttinguna var mjög víðtæk og var aldrei stjórnað frá Kennarasambandinu. Og í samningi ráðherrans við forystu þess er ekki brugðist við neinni þeirri gagnrýni sem fram hefur komið á skerðingaráformin. Hann snýst um eitthvað allt annað. Kannski er vandamálið það að málið er flókið og almenningur veit ennþá ekki hvað felst í hinni nýju námskrá. Nema að mat ráðherrans sé rétt og Íslendingum sé orðið slétt sama hvað felst í gráðunum. En ekki getur meira öfugmæli en „sókn í menntamálum“ um samkomulag ráðherra við Kennarasambandsforystuna. Þetta er samkomulag um sparnað, niðurskurð og gengisfellingu.
áj
|
