Rice finnur rauðu hættuna í suðri 20.2.2006 Condoleeza Rice, utanríkisráðherra Bandaríkjanna, sagði í ávarpi á Bandaríkjaþingi á fimmtudag að Hugo Chávez, forseti Venesúela, væri einhver mesta ógn sem steðjaði að Rómönsku Ameríku um þessar mundir. Við þeirri ógn yrði að bregðast með sameinuðum kröftum allra sem málið varðaði og mynda breiðfylkingu gegn Chávez. Hver sem ekki heldur fyrir eyrun hlýtur að heyra bergmálið af gömlum ræðum um bandalag hinna staðföstu í þessum orðum.Rice sagði að ríkisstjórn Chávez væri ógn við lýðræðið í þessum heimshluta og að valdhafar í Caracas hvettu stjórnvöld annarra ríkja til að feta sig út af braut lýðræðislegra stjórnarhátta. Það virðist því hafa farið framhjá fólki í Hvíta húsinu að Hugo Chávez var kjörinn forseti Venesúela í lýðræðislegum kosningum á sínum tíma, vann með yfirburðum þjóðaratkvæðagreiðslu þar sem landsmönnum gafst kostur á að lýsa á hann vantrausti og að flokkarnir sem styðja ríkisstjórn Chávez unnu stórsigur í þingkosningum í byrjun desember á síðasta ári. Framlag Bandaríkjastjórnar til varnar lýðræðinu þá var að hvetja stjórnarandstöðuflokkana til að sniðganga kosningarnar, sem þeir gerðu með þessum ljómandi góða árangri. Rice fullyrti einnig að stefna Chávez væri ekkert annað en rómanskt afbrigði af popúlisma og hefði komið mörgum ríkjum á vonarvöl. Einhver af starfsmönnum Condy, helst úr þeim hópi sem kann að lesa, myndi gera vel í að taka saman lista yfir þau ríki í Rómönsku Ameríku sem þessi kenning hennar á við. Í leiðinni mætti gera lista yfir þau sem hafa farið í hundana undir herforingjastjórnum sem nutu stuðnings Bandaríkjanna eða af því að haga stjórn efnahagsmála eftir fyrirmælum Alþjóðagjaldeyrissjóðsins og Alþjóðabankans, sem báðir eru í Washington og lúta framkvæmdastjórnum þar sem Bandaríkin ein hafa neitunarvald. Rice sagði ennfremur að hin nánu tengsl Venesúela og Kúbu væru „sérstaklega hættuleg“ og að „alþjóðasamfélagið“ yrði að vera betur á verði fyrir hönd almennings í Venesúela. Ekki er ljóst hverjum er hætta búin af þessum tengslum en trúlega mun olíusala frá Venesúela til Kúbu draga eitthvað úr biti viðskiptabannsins sem Bandaríkjastjórn hefur framfylgt gagnvart Kúbverjum í marga áratugi. Vissulega er það fleira sem stjórnin í Caracas hefur gert til að skaprauna George W. Bush og félögum. Til dæmis lagði hún líknarfélögum til ódýra olíu til húshitunar fyrir fátækt fólk í Bandaríkjunum fyrr í vetur og hefur keypt heilbrigðisþjónustu af Kúbverjum í stórum stíl. Hún hefur einnig lagt fram aðstöðu og fjármagn ásamt ríkisstjórnum Argentínu, Uruguay og Kúbu til að koma á fót gervihnattasjónvarpsstöðinni Telesur sem flytur fréttir hvaðanæva frá Rómönsku Ameríku og á í harðri samkeppni við CNN og stöðvar sem senda út á spænsku frá Miami og Atlanta. Umfjöllun Telesur um þátttöku Bandaríkjahers í borgarastyrjöldinni í Kólumbíu hefur farið sérstaklega fyrir brjóstið á stjórnvöldum í Washington. Ekki þarf að efast um að ríkisstjórn Hugo Chávez verðskuldi ýmiss konar gagnrýni eins og allar aðrar ríkisstjórnir. Hitt er jafn víst að slíka gagnrýni verður að styðja með rökum og að yfirlýsingar Condoleezu Rice eru undarlegt framlag til viðræðna um bætt samskipti Bandaríkjanna og Venesúela en þær hófust í Washington síðastliðinn þriðjudag.
sh
|
