Orkuverðið upp á borðið 9.6.2006 Alain Belda er forstjóri Alcoa – þess fyrirtækis sem reisir álver við Reyðarfjörð og sá hinn sami og undirritaði samninginn við íslensk stjórnvöld um að reisa álverið. Eins og flestum er kunnugt sér Landsvirkjun um að útvega rafmagn fyrir álverksmiðjuna eystra og stendur því í að reisa Kárahnjúkavirkjun. En sú virkjun var samþykkt af nær öllum þingmönnum Samfylkingar, Framsóknar og Sjálfstæðisflokks, þegar málið var tekið fyrir í þingsölum Alþingis.Málatilbúnaðurinn á Alþingi var að mörgu leyti furðulegur en eitt af þeim atriðum sem alltaf hefur verið erfitt að skilja er að þingmenn allra þessara flokka samþykktu að reisa Kárahnjúkavirkjun án þess að hafa vitneskju um söluverð rafmagns til Alcoa. Þannig treystu þingmenn sér til að ráðast í eina stærstu framkvæmd Íslandssögunnar án þess að hafa hugmynd um rekstrarhorfur hennar. Ástæða þess að þessar tölur lágu ekki fyrir er að þær eru trúnaðarupplýsingar milli Landsvirkjunnar og Alcoa. Almenningur, sem er eigandi Landsvirkjunar í gegnum ríkið, má ekki fremur en þingmenn vita hvað rafmagnið kostar. Í þessu ljósi er athyglisvert að nýverið birtist viðtal á heimasíðu Alcoa við Alain Belda um orkusölusamninga í Brasilíu en þar hefur Alcoa verið í umfangsmikilli starfsemi. Í viðtalinu sem nú hefur verið fjarlægt af heimasíðu Alcoa en það má nú nálgast hér kemur fram að Íslendingar selja Alcoa megawattsstundina á 15 dollara sem er víst helmingur á við það sem Brasilíumenn eru að rukka. Þessi tala, sem forstjóri Alcoa nefnir, er svipuð þeirri sem athugun Náttúruverndarsamtaka Íslands leiddi í ljós á dögunum: http://www.natturuverndarsamtok.is Forstjóri Landsvirkjunar og upplýsingafulltrúi Fjarðaáls hafa lýst því yfir að tölurnar sem Belda nefndi séu ekki réttar og raunar viti forstjóri Alcoa lítt hvað hann er að fjalla um. Vel má vera að Belda viti ekkert í sinn haus en hann er nú einu sinni forstjóri fyrirtækisins sem reisir álverið og undirritaði samninga fyrir hönd fyrirtæki síns þess efnis. En látum það liggja milli hluta. Mest er um vert er að verðið á orkunni til Alcoa verði gert opinbert. Það er eina leiðin til að skera úr um hver veit hvað. Auk þess á almenningur heimtingu á að vita hvort hann niðurgreiðir raforku til stóriðju og jafnframt hvort ástæða er til að við ráðum til okkar brasilíska samningamenn til að semja við Alcoa um sölu á orkunni.
hfþ
|
