Ætlar Samfylkingin í ríkisstjórn með Sjálfstæðisflokknum? 22.2.2007 Fyrir okkur sem höfum áhuga á því að mynduð sé ríkisstjórn félagshyggjuflokka eftir næstu kosningar kemur það dálítið á óvart að framámenn Samfylkingarinnar skuli nú beina spjótum sínum af talsverðri hörku að þeim flokki sem hann hefur hamast við að vera sammála að undanförnu.Það eru ekki liðnir nema nokkrir mánuðir síðan Samfylkingin tilkynnti að hún myndi reyna að fylgja Vinstrigrænum eftir í náttúrverndarmálum. Vinstrigræn hafa brugðist eðlilega við þessum sinnaskiptum Samfylkingarinnar með því að gagnrýna fyrst og fremst stjóriðjuflokkana tvo sem fara með völdin og bera ábyrgð á náttúruslysunum sem eru framundan. Eins og sjá má á bloggsíðum Samfylkingarinnar, einkum hjá leiðtoga flokksins í Kópavogi, hefur flokkurinn tekið annan pól í hæðina og ákveðið að einbeita sér að því að gagnrýna eina flokkinn sem alltaf hefur haft skýra stefnu í umhverfismálum. Svo dæmi sé tekið eru fimm af sex seinustu greinum leiðtoga Samfylkingarinnar í Kópavogi helgaðar árásum á Vinstrigræn og verður varla séð að þessi stjórnmálamaður hafi áhuga á neinu öðru en að koma höggi á hinn stjórnarandstöðuflokkinn. Nú er það í sjálfu sér ekki skrýtið að leiðtogar Samfylkingarinnar geri allt sem þeir geta til að koma í veg fyrir að umhverfisverndarsinnar kjósi umhverfisverndarflokk. Samfylkinguna hefur skort trúverðugleika í virkjanaumræðunni frá upphafi og vill þess vegna að umhverfisumræðan snúist sem mest um stefnu og gjörðir annarra flokka. Sem væri kannski í lagi ef gagnrýnin beindist að einhverju leyti að ríkisstjórnarflokkunum sem Samfylkingin ætlar sér að koma frá völdum, fremur en þeim flokki sem stendur Samfylkingunni næst hvað málefnin varðar og hefur hingað til verið augljósasti samstarfsaðili hennar í ríkisstjórn undir hennar forsæti. Eðlilegt er að spyrja hvort þetta sé vísbending um að Samfylkingin ætli að stilla sér upp við hlið hægriflokkanna þriggja, Sjálfstæðisflokks, Framsóknarflokks og Frjálslyndra, í kosningabaráttunni sem framundan er og gagnrýna félagshyggjuflokkinn vinstra megin við sig í stað þess að standa með honum gegn ríkisstjórninni sem ber ábyrgð á fátækt, náttúruspjöllum og stuðningi við blóðugar styrjaldir, svo fátt eitt sé nefnt. Það er sennilega ekki góð hugmynd fyrir þá sem vilja veg félagshyggju og umhverfisverndar sem mestan, en það gæti verið góð hugmynd til að komast í ríkisstjórn eftir kosningar, ef mönnum er sama um það hvað sú ríkisstjórn tekur sér fyrir hendur. Kannski er hernaðaráætlun Samfylkingarinnar að höggva allt að fimm prósenta fylgi af Vinstri grænum og biðla svo til Sjálfstæðisflokksins um ríkisstjórnarsamstarf að kosningunum loknum. Áberandi er velþóknun Samfylkingarinnar á fyrstu ríkisstjórn Davíðs Oddssonar þar sem Alþýðuflokkurinn sat einnig en sú ríkisstjórn vann m.a. það afrek að auka gjaldtöku á sjúklinga. Því verður varla trúað að allir Samfylkingarmenn óski eftir nýrri íhaldsstjórn, með Samfylkingunni í hlutverki hins þæga meðreiðarsveins. En ef við eigum að trúa því að það sé ekki ætlunin, er þá ekki kominn tími á að Samfylkingin sýni að hún er í stjórnarandstöðu, en ekki enn einn pópúlíski hægri-miðjuflokkurinn sem gerir hvað sem til að bæta stöðu sína í skoðanakönnunum? Einu sinni var stundum sagt að Vinstri græn skemmdu fyrir möguleikum félagshyggjufólks til að komast til valda. Núna þegar möguleiki er á vinstristjórn er raunin allt önnur. Samfylkingin virðist hafa gefið sjálfseyðingarhvötinni lausan tauminn og vinnur nú markvisst að því að rífa niður fylgisaukningu félagshyggjuflokkanna tveggja og gera stjórnarandstöðuna sem heild ótrúverðuga. En vonandi nær hún sér bráðlega úr þunglyndinu svo að Vinstri græn þurfi ekki að berjast ein við hægriflokkana þrjá í kosningabaráttunni sem er framundan.
fd
|
