Til umhugsunar á alþjóðlegum baráttudegi kvenna 8.3.2007 Anne Penketh skrifar eftirtektarverða grein í Independent í tilefni dagsins. Þar koma fram allmargar sláandi staðreyndir sem endurspegla stöðu kvenna um víða veröld á líðandi stundu.Enn eru 800 milljónir jarðarbúa ólæsar og tveir þriðjuhlutar þess hóps eru konur. Árlega bætast tvær milljónir stúlkna á aldrinum 5-15 ára í hóp þeirra sem verslað er með á einhvern hátt í hinum alþjóðlega kynlífsiðnaði. Konur eiga innan við 2% alls ræktarlands í heiminum. Konur framleiða helming allra matvæla sem neytt er í heiminum. Rúmlega milljarður jarðarbúa býr við sárafátækt. Þar af eru meira en 700 milljón konur. Í fátækari löndum heims verður heimilisofbeldi fleirum að aldurtila en stríðsátök, bílslys og krabbamein. Fleiri konur á aldrinum 15-44 ára deyja eða örkumlast af völdum kynbundins ofbeldis en malaríu, krabbameins, bílslysa og styrjalda. Í annað hvert skipti sem kona er myrt reynist morðinginn vera maki hennar eða fyrrverandi maki. 43 milljónir stúlkna eiga ekki kost á skólagöngu. Konur inna af hendi tvo þriðju allrar vinnu sem mannkynið skilar en bera úr býtum 10% af heildartekjum þessa sama mannkyns. Nálega þriðjungur allra kvenna er heimilislaus eða lætur fyrir berast í ófullnægjandi húsnæði. Þriðja hver kona sem fæðist í þennan heim þarf að þola kynferðisofbeldi, barsmíðar eða aðra misnotkun, einhvern tíma á ævinni.
sh
|
