|
Hver er Sharon? 9.2.2001 Fyrir fáeinum dögum varð Reagan, fyrrverandi Bandaríkjaforseti, níræður. Á meðan hann var við völd var hann illræmdur fyrir kaldastríðsöfgar, enda ekki vandur að meðulum í stuðningi við dauðasveitir í Mið-Ameríku. Fá óþokkaverk gengu fram af honum, svo fremi þau væru framin í nafni baráttunnar gegn heimskommúnismanum. Þá hétu hryðjuverkamenn jafnan frelsisvinir (freedom fighter). Einn maður úr liði frelsisvina náði þó að hneyksla Reagan með framgöngu sinni, svo mjög að hann krafðist afsagnar hans. Það var Ariel Sharon, landvarnaráðherra Ísraels, maðurinn sem nú hefur verið kjörinn forsætisráðherra þar með miklum yfirburðum.Ísrael mun vera eina ríkið í heiminum þar sem þetta gamla stefnumál Bandalags jafnaðarmanna, að forsætisráðherra sé kosinn beinni kosningu, hefur náð fram að ganga. Oft hefur kjörið leitt til þess að annar maður fékk embættið en hefði gert það ef þingræði væri við lýði. Árið 1996 færði þessi aðferð okkur Netanyahu, núna er það Sharon. Ariel Sharon fæddist í Palestínu í febrúar 1928. Árið 1945 gekk hann til liðs við skæruliðasamtökin Haganah og tók þátt í stríði Ísraels við nágrannalöndin 1948. Árið 1953 tók hann við stjórn 101. herdeildarinnar, sérsveit sem hafði það verkefni að myrða palestínska skæruliða í nágrannaríkjunum. Í október það ár gerði þessi herdeild árás á þorpið Qibya í Jórdaníu. Þar sprengdu Sharon og menn hans upp 45 hús og drápu 69 manns, um helmingur þeirra var konur og börn. Í sjálfsævisögu sinni stærir Sharon sig af þessari aðgerð, enda þótt hans segist harma það að óbreyttir borgarar hafi fallið þar. Árið 1954 fékk Sharon yfir stjórn yfir 809. fallhlífasveitinni sem stundaði svonefndar „fyrirbyggjandi árásir“ á nágrannaríki. Árið 1956 fyrirskipaði Sharon árás á Mitlaskarð á Sinaiskaga í trássi við fyrirmæli sín. Þessi aðgerð hafði í för með sér mikið mannfall af hálfu Ísraelsmanna og féll Sharon því í ónáð. Í sex daga stríðinu náði hann að vinna sig í álit á ný og fékk árið 1969 yfirstjórn svonefnds suðurhers Ísraels sem hafði það verkefni að brjóta á bak aftur andspyrnu Palestínumanna á Gazasvæðinu. Þar varð hann frægur fyrir hrottaskap, þar sem hann stofnaði dauðasveit sem var kölluð Rimon. Meðlimir hennar dulbjuggu sig sem Araba og stunduðu það að taka grunaða af lífi með skoti í hnakkann. Frá þessu segir Sharon í bókinni „Á flótta“. Árásin á flóttamannabúðirnar El Bourj, sem kostaði 15 óbreytta borgara lífið, þ.á m. konur og börn, gekk þó jafnvel fram af félögum í dauðasveitinni. Að loknu Yom Kippur-stríðinu 1973 hætti Sharon í hernum og hóf pólitísk afskipti. Gekk hann til liðs við frjálslyndan flokk og náði kosningu til ísraelska þingsins, Knesset. Hann sneri sér fljótlega aftur að varnarmálum og varð öryggisráðgjafi Yitzhaks Rabin, sem þá var forsætisráðherra. Hann yfirgaf Rabin í fússi, þar sem hann taldi ekki hlustað á ráð sín. Þegar Menachim Begin myndaði fyrstu hægristjórn Ísraels, árið 1977, varð Sharon landbúnaðarráðherra. Gekkst hann fyrir stórfelldum byggingaframkvæmdum á hernumdu svæðunum og tókst að fjórfalda byggð Gyðinga þar á fjórum árum. Árið 1981 gerði Begin hann að landvarnaráðherra og Sharon stóð að hernámi Suður-Líbanons ári síðar. Gekk hann lengra en Begin hafði veitt honum umboð til og sendi herinn alla leið að Beirút, í von um að geta útrýmt PLO í eitt skipti fyrir öll. Þar gerði hann illræmt bandalag við hina kristnu falangista í Líbanon sem hann vopnaði og gaf frjálsar hendur. Það samstarf leiddi til fjöldamorðanna í flóttamannabúðunum Sabra og Shatilla, þar sem falangistar myrtu 800 konur, börn og gamalmenni á meðan ísraelskir hermenn héldu vörð. Það var þessi aðgerð sem gekk meira að segja fram af Ronald Reagan. Óháð rannsóknarnefnd skilaði skýrslu um málið í febrúar 1983 þar sem fram kom að Sharon bæri persónulega ábyrgð á fjöldamorðunum og bæri Begin að reka hann. Átján árum síðar er Sharon orðinn forsætisráðherra Ísraels. Ekki er hægt að fá skýrari vísbendingu um einlægni þjóðarinnar í „friðarferlinu“.
sj
|
