|
Hvað var Siv að hugsa? 14.3.2001 Siv Friðleifsdóttir, umhverfisráðherra, var spurð á Alþingi 6. desember síðastliðinn, um samskipti ráðuneytis hennar við skrifstofu Ramsar-samningsins vegna úrskurðar sem heimilar kísilgúrnám í Syðriflóa Mývatns. Siv sagði þá að náttúran hefði verið látin njóta vafans og engum væri stætt á að halda öðru fram: „Búið er að skoða umhverfishagsmuni og það er ásættanlegt að fara út í Syðriflóa frá þeim hagsmunum.“Mývatns- og Laxársvæðið var fyrsta svæðið á Íslandi sem komst á skrá Ramsar-samningsins um vernd mikilvægra votlendissvæða en það var árið 1977. Eins og flestir vita er lífríki þess einstakt og afar mikilvægt fyrir fjölda fuglategunda. Sem dæmi má nefna að viðkoma alls evrópska húsandarstofnsins er háð varpstöðvunum við Mývatn og Laxá. Sumarið 1990 var þetta svæði sett á lista yfir Ramsar-svæði sem teldust í hættu vegna breytinga í vistkerfinu og var þar vísað til kísilgúrnámsins í Mývatni. Árið 1992 skoðaði ráðgjafanefnd á vegum Ramsar-samstarfsins svæðið og átti viðræður við þáverandi umhverfisráðherra. Nefndin hvatti til þess að fyllstu varúðar yrði gætt og benti á að kísilgúrnáminu fylgdu hættur sem yrði að taka tillit til þó ekkert væri sannað um tengsl þess við vistkerfisbreytingar. Slíkar varúðarráðstafanir eru í samræmi við ákvæði samningsins og stefnumörkun umhverfisráðstefnu Sameinuðu þjóðanna í Rio de Janeiro 1992. Árið 1993 var Mývatns- og Laxársvæðið tekið af fyrrnefndum válista á þeim forsendum að kísilgúrdælingin yrði takmörkuð við Ytriflóa, sem er norðurhluti vatnsins, að allur vatnsbotninn yrði verndaður með lögum og námugröftur í Syðriflóa yrði ekki leyfður þar sem því fylgdi of mikil áhætta fyrir lífríki Mývatns. Það er því ekki nema von að Delmar Blasco, forstöðumaður Ramsar-skrifstofunnar, hafi skrifað Siv Friðleifsdóttur bréf og beðið um rökstuðning hennar fyrir þeirri ákvörðun að heimila námugröft í Syðriflóa að loknu mati á umhverfisáhrifum. Fróðlegt verður að sjá hvort svar Sivjar verður jafn burðugt og í fyrirspurnatímanum á Alþingi 6. desember í fyrra þegar hún sagði forviða: „Hvað eru Vinstri-grænir að hugsa í þessu máli? Búið er að fara í gegnum tvöfalt umhverfismat á Kísiliðjunni við Mývatn og samt koma upphrópanir af þessu tagi.“ Vissi Siv kannski ekkert um ákvæði Ramsar-samningsins og forsendur þess að Mývatns var tekið af válista 1993? Hvað skyldi hún hafa verið að hugsa?
sh
|
