|
Eitrað fyrir íbúum Kólumbíu 16.3.2001 Eitt af umdeildari verkefnum stjórnvalda í Washington á síðustu árum er Kólumbíu-áætlunin svokallaða sem sögð er miða að því að draga úr flæði fíkniefna til Bandaríkjanna. Áætlaðar er að sameiginlegar aðgerðir landanna gegn kókaínframleiðslu í Kólumbíu muni kosta heimamenn 7 milljarða dollara en Bandaríkjamenn leggja fram nálega hálfan annan milljarð. Heil 85% bandaríska framlagsins renna beint til Kólumbíuhers.Fyrir utan hernaðaraðstoðina snýst Kólumbíu-áætlunin að stórum hluta um dreifingu eiturefna yfir kólumbíska akra sem grunur leikur á að séu nýttir til að rækta kóka-runna. Úðunarvinnan hefur mælst illa fyrir meðal margra í Kólumbíu, einkum smábænda sem segja eiturefnunum ekkert síður úðað yfir matjurtir en annan gróður. Í vikunni gengu fjórir fylkisstjórar í Kólumbíu fram fyrir skjöldu og gagnrýndu Kólumbíu-áætlunina opinberlega af mikilli hörku. Ivan Gerardo Guerrero, fylkisstjóri í Putumayo, sem hefur orðið einna harðast úti í eiturefnadreifingunni, sagði að matjurtir hefðu verið ræktaðar á helmingi þess lands sem búið sé að úða í fylkinu. Jafnframt benti hann á að 60% fleiri en áður leituðu sér læknishjálpar vegna húðkvilla, fæðingargöllum færi fjölgandi í Putumayo og ofnæmissjúkdómar væru einnig orðnir mun algengari eftir að Kólumbíu-áætlunin kom til framkvæmda. Parmenis Cuellar, fylkisstjóri í Narino, sagði ljóst að eitrunin hefði þegar haft alvarlegar afleiðingar, stóraukið á félagslegan vanda landsmanna og valdið miklum umhverfisspjöllum. Guillermo Alfonso Jaramillo Martinez, fylkisstjóri í Tolima, lýsti áhyggjum af hinum miklu hernaðarlegu umsvifum og sagði Kólumbíumenn ekki þurfa á suður-amerísku Víetnamstríði að halda. Talsmenn bandaríska utanríkisráðuneytisins vísuðu öllum ásökunum á bug. Þannig sögðu þeir úðunarefnið óskaðlegt með öllu fyrir fólk enda hefði notkun þess gefist vel í Evrópu og alþekkt væri að eiturlyfjaframleiðendur plöntuðu matjurtum innan um kóka-runna og valmúa til að villa um fyrir yfirvöldum.
sh
|
