|
10 ástæður til að andæfa stríði gegn Írak 7.3.2003 Gríðarlegur fjöldi félagasamtaka um víða veröld hefur á undanförnum vikum og mánuðum mótmælt yfirvofandi stríðsrekstri Bandaríkjanna og bandalagsríkja þeirra í Írak. Í þeim hópi hafa umhverfisverndarsamtök verið fyrirferðarmikil, enda hefur nútímahernaður gríðarleg umhverfisspjöll í för með sér til viðbótar við þær mannlegu hörmungar sem honum fylgja. Regnhlífarsamtök fjölda bandarískra félaga og hópa sem vinna að umhverfisverndarmálum (Environmentalists Against the War) hafa sent frá sér lista þar sem tilteknar eru tíu góðar ástæður til að berjast gegn stríðinu. Hér á eftir fer þessi listi, lauslega endursagður og talsvert styttur:1. Árás á Írak gæti drepið hálfa milljón manna, fyrst og fremst almenna borgara Í nóvember síðastliðnum vöruðu bresku samtökin Medact við því að búast mætti við að allt að 260.000 Írakar gætu látið lífið í árásum Bandaríkjahers og að á þriðja hundrað þúsund til viðbótar gætu fallið í valinn vegna hungursneyðar og farsótta í kjölfarið. Sameinuðu þjóðirnar óttast flóðbylgju ekki færri en 900.000 flóttamanna. 2. Stríð eyðileggur búsvæði manna, skaðar lífríkið og mengar jarðveg, vatnsból og andrúmsloft. Skaðinn getur varað í margar kynslóðir UNEP, umhverfisstofnun á vegum Sameinuðu þjóðanna, hefur kannað varanlegan skaða á umhverfinu í kjölfar Flóabardaga 1991. Olíu- og efnamengun, auk geislavirkni er enn verulega mikil á svæðinu. Milljónir tonna af hráolíu láku úr leiðslum og birgðastöðvum, stór hluti strandlengjunnar mengaðist af olíu og krabbameinsvaldandi efnum. Mengun vegna olíubruna hafði áhrif í fjölda nágrannalanda Íraks. 3. Klasasprengjur, sprengjur sem framkalla ofsahita eða rafsegulhögg og vopn sem innihalda sneytt úran samræmast ekki alþjóðalögum. Í Flóabardaga 1991 beittu Bandaríkjamenn óspart sprengjum og skotfærum sem í var sneytt úran og talið er að við það hafi um 300 tonnum af þessu háskalega efni verið dreift yfir Kuwait og suðurhéruð Íraks. Alþjóðaheilbrigðismálastofnunin hefur varað við afleiðingum þessa fyrir heilsufar barna, enda er óumdeilt að sneytt úran getur valdið verulegum skaða ef það berst í meltingarveg manna. Áætlað er að tíðni hvítblæðis og nokkurra annarra krabbameinstilfella hafi sexfaldast í Suður-Írak frá 1991. 4. Sprengjur valda mengun, bæði með ósprungnum sprengjuhleðslum og með því að dreifa sýkla- og efnavopnum Að Flóabardaga loknum 1991 lýstu sádi-arabískir embættismenn því yfir að engum efna- og sýklavopnum hafi verið grandað í árásum bandamanna. Það má teljast mikið lán ef haft er í huga að þegar Bandaríkjaher fargaði nokkrum efnavopnabúrum Íraka að stríðinu loknu tókst ekki betur til en svo að allt að 100.000 hermenn urðu fyrir eitrun. Margir þeirra þjást enn af völdum hennar. 5. Að efna til stríðs vegna olíu mun um síðir koma okkur í koll Efnahagskerfi sem byggir á brennslu jarðefnaeldsneytis skaðar Jörðina. Það mengar andrúmsloftið og stuðlar að gróðurhúsaáhrifum. Mannkynið þarf að draga úr olíunotkun ekki auka hana. Að efna til styrjalda til að tryggja yfirráð okkar yfir slíkum orkulindum er skammsýni. Þess í stað ættu Vesturlönd að tryggja öryggi sitt með því að ýta undir notkun vistvænna orkugjafa. 6. Árásárstríð eru ólíðandi yfirgangur Árás á annað ríki að fyrra bragði er gróft brot á alþjóðalögum og grefur undan hugsjónum Sameinuðu þjóðanna um frið og öryggi í heiminum. Að skjóta hundruðum flugskeyta á fimm milljón manna borg er ekkert annað en stríðsglæpur. 7. Árás kallar á hefndaraðgerðir Sérfræðingar CIA hafa lýst þeirri skoðun sinni að Saddam Hussein sé ekki líklegur til að beita efna- og sýklavopnum nema í sjálfsvörn. Hefndaraðgerðir af þeim toga gætu beinst gegn skotmörkum á Vesturlöndum. 8. Aukinn fjáraustur til hernaðar mun bitna á mikilvægum verkefnum á sviði félags-, heilbrigðis-, mennta- og umhverfismála Áætlað hefur verið að stríð í Írak og hernám í kjölfarið muni kosta allt að 200 milljarða Bandaríkjadala. Ljóst er að þessum fjármunum mætti verja mun betur annars staðar. 9. Hervæðing og "stríðið gegn hryðjuverkum" eru að grafa undan frelsi og mannréttindum í Bandaríkjunum sjálfum Lög sem sett hafa verið undir því yfirskini að berjast gegn hryðjuverkum (US PATRIOT Act) hafa verið notuð til að ofsækja innflytjendur og ala á ótta og kynþáttahatri. Í skálkaskjóli hryðjuverkaógnarinnar hafa ýmis borgaraleg réttindi verið fótum troðin og upplýsingalög hafa verið numin úr gildi í nafni öryggis. Lög sem takmarka frelsi borgaranna til að andæfa stefnu yfirvalda bitna á umhverfisverndarsamtökum sem og öðrum frjálsum félagasamtökum. 10. Bandaríkin hafa hótað að beita kjarnorkuvopnum gegn Írak Í desember 2002 áréttuðu hermálayfirvöld að Bandaríkin áskildu sér rétt til að beita öllum tiltækum vopnum, þar með talið kjarnorkuvopnum í viðureign við óvini sína. Ríkisstjórn Bush vinnur nú að þróun "lítilla" kjarnorkuvopna til notkunar í hernaðarátökum. Hver slík "smásprengja" hefur fjórðung þess sprengjukrafts sem lagði Hiroshima í rúst.
sp
|
