|
Manstu...? 21.3.2003 * Manstu eftir Flóabardaga 1991?* Manstu hvernig fréttamennirnir spenntust upp og lýstu stríðinu eins og það væri íþróttakappleikur - hversu óþreyjufullir þeir urðu þegar "ekkert var að gerast"? * Manstu eftir öllum fréttaskýringunum um það hvernig það stríð átti að vera öðruvísi en öll önnur stríð? * Manstu eftir hárnákvæmu sprengjunum sem áttu að hitta títuprjónshaus á jörðu niðri? * Manstu eftir hrifningunni í röddum fréttamannanna og sérfræðinganna sem hömruðu á því að mannfall almennra borgara væri nánast ekkert - að sprengjurnar féllu einungis á hernaðarleg skotmörk? * Manstu eftir vantrúnni þegar fyrstu fréttirnar bárust af því að konur og börn hefðu fallið? * Manstu eftir kenningunum um að þau dauðsföll hlytu að vera sviðsett að harðstjórunum í Bagdad? * Manstu eftir fyrstu frásögnunum að stríðinu loknu af hinni raunverulegu eyðileggingu? Frásögnum sem ekki fengust birtar í stærstu fjölmiðlunum fyrst í stað. * Manstu hversu sneyptir margir urðu nokkrum mánuðum eftir stríðið þegar sannleikurinn kom í ljós? * Manstu þegar Pentagon lýsti því yfir að stærsti sigurinn í Flóabardaga hefði falist í því hvernig tókst að stýra fréttaflutningnum af stríðinu? * Manstu þegar fjölmiðlarnir lofuðu að láta ekki blekkjast aftur með þessum hætti? * Manstu hvað við vorum fljót að gleyma Írak aftur og snúa okkur að öðrum málum? * Manstu eftir Júgóslavíu? Manstu eftir Kosovo? Manstu eftir Afganistan? - Hvernig öll þessi stríð voru kynnt til sögunnar sem nútímaleg hátæknistríð, án borgaralegs mannfalls, þar sem allar sprengjur lentu á illmennum? - En til hvers svo sem að muna? Eins og við vitum öll verður þetta stríð öðruvísi en öll önnur stríð. Það getur hvaða barn sem er séð - í sjónvarpinu.
sp
|
