|
Nató-vinir furðu lostnir Á blaðsíðu fjögur í Morgunblaðinu í dag (þriðjudaginn 18. janúar) birtist lítil frétt með mikilli fyrirsögn. Þar er því slegið upp eins og um stórtíðindi sé að ræða að Steingrímur J. Sigfússon verði meðal framsögumanna á fundi Samtaka um vestræna samvinnu og Varðbergs, þar sem ætlunin er að fjalla um "öryggis- og varnarmál Íslands á nýrri öld". Vissulega væri það saga til næsta bæjar ef Steingrímur væri með þessu að ganga í lið með fundarboðendum og hyggðist þannig kúvenda í afstöðu sinni til hersins og Atlantshafsbandalagsins, verður því að ætla að ýmsir hafi hrokkið við þegar þeir ráku augun í fyrirsögnina og flýtt sér að lesa meginmál fréttarinnar.Við þann lestur kemur hins vegar í ljós, að formaður VG hefur hvergi hvikað í andstöðu sinni við hernaðarbandalagið og umsvif þess hér á landi. Þvert á móti mun hann mæta á ráðstefnuna til að rökstyðja sjónarmið sín í málinu og standa upp í hárinu á hernaðarsinnunum. Það er ekki kyn þótt Nató-vinunum í SVS og Varðbergi bregði við þetta. Fram til þessa hefur sú hugsun að taka þátt í rökræðum við andstæðinga sína verið þeim fjarlæg. Um árabil, hafa samtök þessi neitað að taka þátt í kappræðum við friðarsinna og var það lengi vel yfirlýst stefna þeirra að koma ekki fram á fundum þar sem fulltrúum frá Samtökum herstöðvaandstæðinga var boðið að mæta. Undrun þeirra yfir því að pólitískur andstæðingur sé tilbúinn að mæta þeim á þeirra eigin heimavelli er því skiljanleg og ekki nema eðlilegt að Morgunblaðið slái því upp sem stórfrétt.
sp
|
